Gair neu ddau am Ŵyl Soundtrack

Cyn diwedd mis Tachwedd 2008, bydd prifddinas Cymru'n cynnal yr ŵyl ffilm a cherddoriaeth fwyaf uchelgeisiol ac arloesol i'r DU ei gweld erioed.

Caiff ei lleoli yn ardal hanesyddol y Bae, rhwng 26- 29 Tachwedd.  Bydd Caerdydd yn ‘gartref' i wneuthurwyr ffilmiau a cherddorion byd-enwog, wrth iddynt ddod at ei gilydd i gymryd rhan yn SOUNDTRACK: Gŵyl Ffilm a Cherddoriaeth Ryngwladol i Gymru.

Thema neilltuol yr ŵyl yw'r berthynas sydd gan gerddoriaeth â ffilmiau.  Caiff y thema honno ei chlodfori trwy gyfrwng rhaglen lawn sy'n cynnwys dangos ffilmiau, dosbarthiadau meistr, areithiau arbennig a gweithdai.  Ar ben hynny fe geir cerddoriaeth fyw - o'r clasurol hyd at sesiynau ymylol gan grwpiau roc a rôl cyfoes.  Felly bydd cynulleidfa SOUNDTRACK yn amrywio cymaint â'r artistiaid a fydd yn perfformio yno. 

Yn ystod y rhaglen ddigwyddiadau amrywiol dros ben, bydd gwneuthurwyr ffilmiau o Gymru yn cael cyfleoedd i ddangos eu ffilmiau i gynulleidfa ehangach.  A bydd ‘sêr’ rhyngwladol yn cael cyfle i gwrdd â’r edmygwyr hynny a gyfrannodd at lwyddiant yr enwogion hyn.  Disgwylir y bydd mwy na 7,000 o bobl yn dod yno, o wneuthurwyr ffilmiau hirsefydlog hyd at bobl ddawnus sy’n dechrau dod i’r amlwg ym myd ffilmiau a cherddoriaeth. 
 

Bydd llawer o leoliadau perfformiadau byw mwyaf trawiadol y bae yn cael eu defnyddio, gan gynnwys adeilad byd-enwog Canolfan Mileniwm Cymru.  Felly yn ystod SOUNDTRACK: Gŵyl Ffilm a Cherddoriaeth Ryngwladol i Gymru bydd pobl yn heidio i’r sinema neu’n mynd i fwynhau perfformiad byw â thro annisgwyl iddo.  Mae gan y digwyddiad blynyddol hwn rywbeth i bawb sy’n hoff o ffilmiau neu gerddoriaeth – neu’r ddau ohonynt.