Mai 12fed, 2008

Daeth Asiantaeth Ffilm Cymru a goreuon diwydiant ffilmiau a cherddoriaeth Cymru at ei gilydd heddiw i ddathlu digwyddiad lansio'r ŵyl ffilm a cherddoriaeth ryngwladol gyntaf un i Gymru.

Cafodd y derbyniad lansio tra amlwg ar gyfer SOUNDTRACK ei lywyddu gan Weinidog Treftadaeth Cymru, Rhodri Glyn Thomas, a'i gynnal yn yr Eglwys Norwyaidd ym Mae Caerdydd. Roedd yn gyfle gwych i gyflwyno'r digwyddiad diwylliannol trawiadol i'r gynulleidfa a oedd yn cynnwys gwneuthurwyr ffilmiau a cherddorion enwog a'r cyfryngau hefyd.

Peter Edwards yw Prif Weithredwr Asiantaeth Ffilm Cymru ac fe eglurodd yr hyn y byddai'r digwyddiad unigryw yn ei gynnig i Gymru, gan ddweud: "Bydd SOUNDTRACK yn rhoi amlygrwydd i ddiwydiant ffilm a cherddoriaeth Cymru. Yn wir, rydym yn gobeithio'n fawr iawn y bydd yr ŵyl hon yn dod â manteision go iawn, hir eu parhad, i ddiwydiant ffilm a cherddoriaeth Cymru. Bydd y gynulleidfa yn un ryngwladol ac felly bydd y cynnwys yn arloesol a diddan a bydd yn denu'r diwydiant a'r cyhoedd fel ei gilydd."